رانيا يوسف تتغزل في منى زكي: "مثال وقدوة لكل ست.. بحبك وبحترمك وبقدرك"

نشرت الفنانة رانيا يوسف بوستاً مطولاً عبر صفحتها على مواقع التواصل الاجتماعي، عبّرت فيه عن حبها وإعجابها بالفنانة منى زكي، وذلك بعد تكريم الأخيرة.

وكتبت رانيا يوسف في البوست الذي حمل عنوان "بوست في حب منى زكي": "ترددت كتير إني أكتب بوست في حب منى زكي، لأني مش بعرف أتكلم كلام منمق ومتزوق، ومش شاطرة في اختيار الكلمات، ومش بعرف أقول كلام من قلبي بجد قدام الكاميرا وقدام الناس، علشان كده أخدت وقت شوية أكتب البوست ده".

وأضافت: "لما سمعت كلمة شاكر وشفت منى وسمعتها في التكريم دموعي نزلت غصب عني، بإحساسي بيها وبكل كلمة حستها وقالتها، وقد إيه تعبت في حياتها على كل المستويات، واشتغلت على موهبتها وعلى نفسها وعلى بيتها وولادها وحياتها، والخوف على كل ده واللي طول الوقت ملازمها إنها تنجح كانسانة وأم وزوجة وفنانة وصديقة".

وتابعت: "وطبعاً ولأني ست في نفس المجتمع ده حاسة بالصراع اللي بيدور في نفس كل ست عايشة في مجتمع طول الوقت بيصدر أحكام وهو قاعد على الكرسي ماسك الموبيل وبيحكم بالمظاهر وبيبقى عايز يصدق الوحش قبل الحلو، وعلشان تقدر تعيش وتنجح وتثبت نفسها وتبقى متوازنة في الحياة بكل الخوف والحرب اللي طول الوقت احنا كستات عايشين فيه، ده شيء صعب جداً حد يوصله ومحتاج مجهود جبار".

واختتمت رانيا يوسف: "علشان كده منى زكي بالنسبالي مش بس زميلة موهوبة وناجحة ومحاربة، هي مثال وقدوة لكل ست، نادر إنها تعرف تحقق المعادلة الصعبة دي. بحبك يا منى وبحترمك وبقدرك إنسانياً وفنياً جداً، وربنا ينجحك كمان وكمان ويحفظك حبيبتي ويفرحك بولادك وحوزك ونجاحك، وحقيقي فخورة إني زميلتك".