«أنا آسف معلش».. باسم يوسف يتحدث أمام السيسي في منتدى مصر 2026 (فيديو)

شارك الإعلامي والممثل الكوميدي ومقدم برامج تلفزيونية باسم يوسف خلال منتدى مصر 2026 من خلال تقرير مصور «وراء الشاشة»، معبرًا عن سعادته بتلك المشاركة، ومعتذرًا عن عدم الحضور مباشرة في المؤتمر لالتزامه بالعمل في الخارج.

وقال خلال التقرير الذي عُرض خلال المنتدى: "أخباركم إيه في مصر؟ أنا آسف معلش، أنا بكلمكم من وراء الشاشة، أنا وسط الجولة بتاعتي وطالع بعد شوية أعمل عرض في المسرح هنا، فبعتذر عن اللخبطة والبعد ده. إزيكوا؟

تابع: «أنا عايز أقول كلمة قصيرة، الموضوع كان سبب نجاحي وشهرتي، وأحيانًا كان برضه سبب مشاكل كتير حصلتلي، اللي هو السوشيال ميديا، والحقيقة السوشيال ميديا زي ما هي مهمة ومفيدة ليا ولملايين الناس حوالين العالم، الواحد بدأ يشوف جوانب تانية بتأثر على حياتنا اليومية بطريقة مش لطيفة».

أضاف: «بتأثر على علاقتنا مع بعض. مش أنتوا ساعات كده بتخشوا كده على السوشيال ميديا وبتحسوا فجأة كده لما بتتناقشوا إن ضغطك عليّ ونرفزتك زادت، وعمال تتخانق مع دبان وشك وناس ما كانش عندك معاهم أي مشكلة، ابتديت تقلب عليهم وتكرههم وتحملهم كل المشاكل اللي حواليك. إحنا كلنا شوفنا الحاجات دي، فجأة ماتش كورة يقلب بشتيمة بينا وبين إخواتنا في المغرب، واللي حصل في مصر لأخواتنا وضيوفنا من سوريا والسودان، فجأة نصحى نلاقي نفسنا ماسكين فيهم وهما ماسكين فينا من غير مناسبة، هوب تلاقيينا ماسكين في إخواتنا في السعودية (يا طعمية يا كبسة)، مش إحنا بنشوف كده؟!».

استكمل: «للأسف ده جانب متوقع من الإنترنت، اللي بيخش المجال المفتوح ده هيتعرض لده، لكن أنا وأنتم عارفين إن فيه حاجات بتولع بطريقة مبالغ فيها، حتى لو كان في سبب للخلاف والخناق ما بين ناس قليلين في بلدين أخوات، تلاقي الخلاف والزعل ده كبر وتضخم، وما تعرفش الشعللة دي جت منين. بس إحنا بقينا عارفين، عارفين الحسابات اللي لا هي مغربية ولا مصرية ولا سعودية، اللي بتخش تولع الدنيا وتوسع الخلاف والكراهية دي».

أشار: «أنا سافرت وشوفت بعيني الحب ما بين أهلنا في الدول العربية والبلاد الغربية، آلاف الناس من كل الجنسيات بيحضروا حفلاتي، وما شوفتش منهم غير كل حب وتلاحم وراحة وونس. أنا هنا دلوقتي في مسرح من دول، وبعد شوية هيبقى مليان ناس من كل الجنسيات العربية، بنضحك وننبسط مع بعض. أيوة إحنا بينا خلافات، وأيوة إحنا ساعات بيحصل بينا غلط، بس إحنا أكبر من كده، وأعتقد في الأوقات دي إحنا محتاجين إننا ما نخليش الخلافات دي تفرق بينا وتكبر أكبر من كده، أو تكبر أكبر من كده».

اختتم كلماته: «أنا عارف إن إحنا بنهرب ساعات من حياتنا وبنقضي وقت على السوشيال ميديا، لكن أتمنى إن السوشيال ميديا ما تفسدش علينا حياتنا. وحشتوني، أشوفكم قريب، وإن شاء الله أزور المتحف المصري وأرجع أعمل كايت سيرفينج وآكل مانجا عويسي، وبعد إذنكم عشان عندي شوية ناس أضحكهم».

منتدى مصر 2026

تنطلق فعاليات «منتدى مصر 2026»، اليوم الاثنين، ويستمر حتى السبت 24 أكتوبر الجاري بالعاصمة الجديدة، والذى دعا إليه الرئيس عبدالفتاح السيسي، في إطار توجه يستهدف تعزيز الحوار المجتمعي، والاستماع إلى آراء المواطنين وشواغلهم بشأن القضايا والملفات التي تمس حياتهم اليومية، ومناقشة أولويات العمل خلال المرحلة المقبلة.

ويأتي منتدى مصر في إطار حرص الدولة على توسيع نطاق المشاركة المجتمعية، وفتح مساحة للحوار بين الحكومة والمواطنين والخبراء والمتخصصين وممثلي مختلف قطاعات المجتمع، بشأن أثر السياسات العامة والمشروعات القومية والبرامج التنموية التي نُفذت خلال السنوات الماضية، ومدى انعكاسها على مستوى معيشة المواطنين وجودة الخدمات المقدمة إليهم.

محاور منتدى مصر 2026

تدور أعمال المنتدى حول أربعة محاور رئيسية، تشمل «بناء الإنسان»، و«التنمية المتكاملة وجودة حياة المواطن»، و«الحماية والأمان المجتمعي»، و«الاقتصاد»، إلى جانب جلسات محاكاة وورش عمل وجلسات متخصصة للخبراء، تستهدف التعمق في عدد من الملفات ذات الأولوية.

ويبدأ المنتدى بمناقشة محور «بناء الإنسان»، من خلال جلسات تتناول تطوير التعليم والتدريب، وجودة التعلم والمناهج والتقييم، ومدى جاهزية الطلاب للجامعة وسوق العمل، فضلًا عن تطوير التعليم الجامعي وربط البحث العلمي والابتكار باحتياجات سوق العمل ووظائف المستقبل.