مؤسس «أمهات مصر» تتابع استعدادات امتحانات شهر أكتوبر.. وأولياء أمور: «مش لاقيين وقت بسبب التقييمات»

استعدادًا لانطلاق امتحانات شهر أكتوبر للعام الدراسي الجديد 2026-2027، تابعت عبير أحمد، مؤسس اتحاد أمهات مصر للنهوض بالتعليم وائتلاف أولياء الأمور، مدى استعداد الطلاب وأولياء أمورهم لأول امتحانات شهرية بالعام الدراسي الجديد.

وشددت عبير، في تصريحات صحفية، على أولياء الأمور بتهيئة المناخ المناسب والملائم لأبنائهم داخل الأسرة وتشجيعهم على المذاكرة والاجتهاد في دراستهم، وحتى يستطيعوا التركيز في مذاكرة المناهج، متمنية التوفيق لجميع الطلاب.

وتفاعل العشرات من أولياء الأمور على صفحة اتحاد أمهات مصر، في الفيسبوك، حيث قالت ولي أمر: «بسبب التقييمات ولا لاقين وقت نذاكر اللي داخل في الامتحان، بنجري ورا نفسنا واجبات مدرسة وتقيمات ربنا يتولانا ويتولي أولادنا، حرب التقييمات والواجبات ده لازم يكون في حل الله المستعان».

وأضافت ولي أمر أخرى: «لا طبعا مش مستعدين، هنلاحق على المذاكرة منين واحنا شغالين تقييمات وأداء صفي ومنزلي وواجبات، مفيش أي وقت للمذاكرة»، واستكملت ولي أمر أخرى: «أسبوع الامتحانات، الطلبة بتاخد منهج الشهر اللى بعده نخلص امتحانات ونجرى نذاكر بسرعة اللى أخدوه والولاد بتتلخبط ما بين الشهر اللى بيمتحنوا فيه وبين منهج الشهر الجديد،تعبنا نقول رجعونا لنظام الميدتيرم بيلم تلتين المنهج وبيدى فرصة للطالب يذاكر ويحل من غير ما نجرى بدل الماراثون اللى احنا فيه، يارب الوزير يسمع لأولياء الأمور».