ارتفاع أسعار البصل في المحافظات.. والكيلو يصل إلى 35 جنيهًا

ففى أسواق مدينة المنصورة بلغ سعر كيلو البصل الأبيض ٢٧ جنيها والأحمر ٣٥ جنيها، وبلغ سعره فى سوق سعد زغلول بالقاهرة بين ٣٠ و٣٥ جنيها، وتراوح سعره فى أسواق دمياط من ٢٨ إلى ٣٢ جنيها، بينما بلغ سعره فى سوهاج ٣٥ جنيها.

هبة عبد الحميد، ربة منزل، قالت: «كنا زمان بنقول على الحاجة الرخيصة ماتسواش بصلة، لكن دلوقتى البصل بقى له سعر وغالى كمان، والمواطن الغلبان مش عارف يعيش، فالبصل يدخل فى كل الأكلات ولا يمكن الاستغناء عنه والتجار بتستغل ده وكل يوم بسعر مختلف».

سيدة منصور، بائعة خضار بسوق الدراسات بالمنصورة، أوضحت أن البصل قليل فى السوق والتجار الكبار هم اللى بيحددوا السعر، مؤكدة أن البصل يخرج من تاجر الجملة للبائع بسعر من ٢٠ لـ ٢٥ جنيها حسب نوعه وجودته وبعد إضافة النقل والمشال يصل للمواطن فى أسواق التجزئة بسعر من ٣٠ إلى ٣٥ جنيها، أنا بكسب ٢ جنيه فى الكيلو فقط وحركة البيع قليلة.

مينا عبد الملاك، تاجر خضروات، قال لـ«المصرى اليوم» إنه تم فتح باب التصدير هذه العام للبصل، خاصة لدول الخليج، وعدد كبير من الفلاحين خزنوا البصل فى بداية الموسم وباعوا الكميات للمصدرين بأسعار أعلى من السوق المحلية ولذلك أصبحت الكميات المعروضة قليلة ولا تتناسب مع الاستهلاك، مضيفًا: «البصل غالى عليا وعلى الزبون ومش التاجر اللى بيحدد السعر لكن العرض والطلب هو الأساس».

حاتم النجيب، نائب رئيس شعبة الخضار والفاكهة باتحاد الغرف التجارية، أوضح أن المعروض من البصل الآن من المخزون الاستراتيجى للمحصول، قائلا: «مفيش بصل جديد حاليا، وسينخفض سعره بعد جنى المحصول الجديد بالصعيد فى ديسمبر المقبل».

الدكتور عبدالمجيد مبروك، رئيس قسم بحوث البصل بمعهد البحوث الزراعية، نفى مسؤولية التصدير فى ارتفاع سعر البصل قائلا: «السوق المحلية تمتلك إنتاجا وفيرا من البصل يصل إلى مليون ونصف طن، وهى كمية تكفى السوق المحلية والتصدير، ومصر من الدول الكبرى المنتجة والمصدرة للبصل».